Primary tabs

မေတ္တာတရား၏ သင်္ကေတပုလဲ

ပုလဲသည် အခြားကျောက်မျက်များကဲ့သို့ ကြွားဝါခြင်း၊ ဂုဏ်မောက်ခြင်းစသော အရိပ်အယောင်ကိုမဆောင်ဘဲ တည်ကြည်ငြိမ်သက်ခြင်းနှင့် မေတ္တာတရားတို့၏ ကျက်သရေကိုဆောင်လေသည်။ ပုလဲရောင်ကဲ့သို့ပင် ဝတ်ဆင်သူကိုဖြူစင်ကာ လှပသောအမြင်ကို ဖြစ်စေသည်။

ပုလဲအမျိုးအစားများ
ပုလဲသည် ခရုကမာကောင် Mollusks မျိုးနွယ်များမှ ထွက်ရှိထုတ်လုပ်ပါသည်။ အခွံနှစ်ခုပါသော ခရုကမာကောင် အမျိုးပေါင်း (၈၀၀၀)ခန့်ရှိသည့်အနက် အမျိုး(၂၀)ခန့်သာ ပုလဲထွက်ရှိပါသည်။ ရေချိုတွင်ရှင်သန်ပြီး ပုလဲထုတ်လုပ်နိုင် သည့် ခရုကမာမျိုးကို ဂုံးကောင် Mussel ဟု ခေါ်ပါသည်။ ရေငန်တွင် ရှင်သန်ပေါက်ဖွားပြီး ပုလဲထုတ်လုပ်နိုင်သည့် ခရုကမာကောင်မျိုးကိုမူ မုတ်ကောင် Oyster ဟု ခေါ်ပါသည်။

ရေငန်ပုလဲ (၃)မျိုးရှိသည့်အနက် ဂျပန်ပုလဲဟုခေါ်သည့် အကိုယာပုလဲ Akoya Pearl များကို Pinctada Fucata မုတ်ကောင်မှ မွေးမြူထုတ်လုပ်ပြီး ဂျပန်တွင် အများဆုံး ထုတ်လုပ်ကာ ပုလဲနက်ဟု လူသိများသော Tahitian Pearl များကို Pinctada Margaritafera မုတ်ကောင်မှ ထုတ်လုပ်ပြီး တဟေတီနိုင်ငံတွင် အများဆုံး ထုတ်လုပ်ပါသည်။ 

ရေငန်ပုလဲ အမျိုးအစားများဖြစ်သည့် တောင်ပင်လယ်ပုလဲ South Sea Pearl များကို Pinctada Maxima မုတ်ကောင်များမှ မွေးမြူထုတ်လုပ်ပြီး သြစတေးလျနိုင်ငံတွင် အများဆုံးထုတ်လုပ်ပါသည်။ ယင်းမုတ်ကောင်မျိုးသည် တောင်ပင်လယ်ဟုခေါ်သည့် အရှေ့တောင်အာရှ၏ တောင်ဘက်ကမ်းခြေနှင့် သြစတြေးလျတိုက်၏ မြောက်ဘက်ကမ်းခြေအကြား ရေပြင်တွင်သာ ရှင်သန်ပေါက်ဖွားပါသည်။ ထို့ကြောင့် တောင်ပင်လယ်ပုလဲကို သြစတေးလျနိုင်ငံ၊ အင်ဒိုနီးရှားနိုင်ငံ၊ ဖိလစ်ပိုင်နိုင်ငံနှင့် မြန်မာနိုင်ငံတို့တွင်သာ မွေးမြူထုတ်လုပ်ထွက်ရှိပါသည်။ 

ပုလဲဖြစ်ပေါ်ပုံ 
ပုလဲသည် မုတ်ကောင်၏ ခန္ဓာကိုယ်အတွင်း တွင် ဖြစ်ပေါ်ပြီး ပုလဲသားအလွှာ layers of Nacre များဖြင့် ဖွဲ့စည်းထားပါသည်။ ပုလဲသားမှာ ကယ်လ်စီယမ် ကာဘွန်နိတ် (၉၃%) နှင့် ကျန် (၇%)မှာ သြော်ဂဲနစ်ဒြပ်ပေါင်းနှင့် ရေများပါဝင်ဖွဲ့စည်းထားခြင်း ဖြစ်ပါသည်။ ပုလဲသား တစ်လွှာလျှင် (၀.၀၀၀၀၅) မီလီမီတာ အထူရှိပါသည်။ မွေးပုလဲတစ်လုံးတွင် ပုလဲသားအလွှာပေါင်း (၁၀၀၀)ထက်မနည်း ရှိပါသည်။ မုတ်ကောင်များသည် တစ်ရက်လျှင် ပုလဲသားအလွှာ (၃)လွှာမှ (၇)လွှာအထိ ဖုံးအုပ်လေ့ရှိပါသည်။

မွေးပုလဲ
မွေးပုလဲဆိုသည်မှာ သဘာဝပုလဲ ဖြစ်ပေါ်မှုဖြစ်စဉ်ကို လူတို့က ပြုပြင်ဖန်တီးထားခြင်း ဖြစ်ပါသည်။ ပုလဲသား၏ သိပ်သည်းခြင်းနှင့် တူညီသောဝတ်ဆံလုံး (Nucleus)ကို ဆက်သားစ (Mantle) နှင့်အတူ မုတ်ကောင်၏ ခန္ဓာကိုယ်အတွင်းသို့ ထည့်သွင်းပေးခြင်းဖြစ်ပါသည်။ ထိုသို့ထည့်သွင်းရာတွင် ဝတ်ဆုံလုံးအလွယ်တကူ ပြန်ထွက်မသွားစေရန်နှင့် လုံးဝန်းကြီးမှားသော ပုလဲရရှိစေရန်အတွက် မုတ်ကောင်၏ ခန္ဓာကိုယ်အားခွဲစိတ်၍ သတ်မှတ်နေရာသို့ရောက်ရှိအောင် ကျွမ်းကျင်သူများမှ ဝတ်ဆံသွင်းယူရခြင်း ဖြစ်သည်။ မွေးပုလဲတစ်လုံးတွင် ပုလဲသား၏ အထူမှာ (၀.၄)မီလီမီတာမှ (၄.၀)မီလီမီတာအထိ ရှိနိုင်ပါသည်။ ပုလဲ၏သိပ်သည်းခြင်း  Density မှာ (၂.၆ မှ ၃.၀) အတွင်းရှိပြီး မာကြောမှု Hardness မှာ Mohs Scale အရ (၃.၅) ရှိပါသည်။

ပထမဆုံးသော မွေးပုလဲကို ဂျပန်လူမျိုး မီကီ မိုတိုဆိုသူက ၁၈၉၈ ခုနှစ်တွင် စတင်ဖော်ယူနိုင်ခဲ့ပြီး ဂျပန်ဘုရင်အား ဆက်သနိုင်ခဲ့ပါသည်။ မြန်မာနိုင်ငံ မြိတ်ကျွန်းစုတွင် မွေးပုလဲထုတ်လုပ်မှုလုပ်ငန်းကို ဂျပန်ကုမ္ပဏီတစ်ခုဖြစ်သော South Sea Pearl Company နှင့် မြန်မာနိုင်ငံမှ ကော့သောင်း ကုန်သွယ်မှုအသင်းတို့ ပူးပေါင်းကာ (၁၉၅၄)ခုနှစ်တွင် မြန်မာနိုင်ငံမှ ပထမဆုံးမွေးပုလဲများ ထွက်ရှိခဲ့ပါသည်။

ပုလဲထိန်းသိမ်းရန်
န၀ရတ်ကိုးပါးတွင် ပါဝင်သော ရတနာများ၌ စိန်၏ မာကြောမှုမှာ(၁၀) ဖြစ်၍ အမြင့်ဆုံးဖြစ်ပြီး ပုလဲ၏မာကြောမှုမှာ အနိမ့်ဆုံးဖြစ်ခြင်းတို့ကြောင့် စနစ်တကျထိန်းသိမ်းသုံးစွဲရန် လိုအပ်ပါသည်။ ပုလဲအား အခြားသော လက်ဝတ်ရတနာများနှင့်အတူ သိမ်းဆည်းခြင်းမှ ရှောင်ကြဉ်သင့်ပါသည်။ ရေနွေးဖြင့် ဆေးကြောခြင်း မပြုလုပ်ရပါ။ နူးညံ့ပြီး စိုစွတ်သောအဝတ်ဖြင့် အသာအယာပွတ်၍ သန့်ရှင်းရေးကို ပုံမှန်ပြုလုပ်ပေးသင့်ပါသည်။ ပုလဲသည် ဘောဒီစပရေး၊ ရေမွှေးတို့နဲ့ ထိခံရလျှင် အရောင်ပြယ်လျော့တတ်သည်။

ပုလဲကို ကမာကောင် (သို့) မုတ်ကောင်မှရရှိပြီး သဘာဝပုလဲနှင့် မွေးမြူရေးပုလဲဟု ခွဲခြားခေါ်ကြသည်။ ခွံဖုံးပုလဲနှင့် ခွံကပ်ပုလဲတို့လည်း ပါရှိသေးသည်။ ပုလဲဟူသောဝေါဟာရမှာ ရှေး ပြင်သစ်ဘာသာစကား (Perle) နှင့် ဥရောပအလယ် ခေတ်၏ ရှေ့သုံးစကားဖြစ်သော အင်္ဂလိပ်ဝေါဟာရ (Perla) မှတစ်ဆင့် Pearl အဖြစ် ကူးပြောင်းလာသည်ဟု သိရသည်။ ဖြူစင်တဲ့အရောင်ရှိတယ်၊ မိန်းမသားဆန်တဲ့ ဂုဏ်သတ္တိရှိတယ်လို့ ဆိုကြတယ်။ သူ့ကိုမြင်လိုက်တာနဲ့ နူးညံ့သိမ်မွေ့တဲ့ စွမ်းအားတွေပေးတယ်တဲ့။ တစ်ချို့ကတော့ မျက်ရည်နဲ့နှိုင်းကြတယ် ကမာကောင်လေးတွေရဲ့ မျက်ရည်တဲ့၊ အမျိုးသမီးတွေ မျက်ရည်ကျရင်လည်း ပုလဲမျက်ရည်လို့ ဆိုကြသေးတယ်။ ပုလဲက မုတ်ကောင်ရဲ့ ခန္ဓာကိုယ်တွင်းမှဖြစ်လာပြီး အရည်တစ်မျိုးကို စွန့်ထုတ်ရာကနေ ပုလဲလုံးလေးတွေ ဖြစ်လာပါတယ်။ 

တန်ဖိုးသတ်မှတ်ရာတွင် အချက် (၇)ချက်ပေါ် မူတည်ပြီး သတ်မှတ်ကြပါတယ်။
ပုလဲတစ်လုံးအား တန်ဖိုးသတ်မှတ်ရာတွင် အောက်ဖော်ပြပါ အချက် (၇)ချက်ပေါ်တွင် အခြေခံ၍ ဆုံးဖြတ်ရပါသည်။

၁။    ပွင့်ရည် (အရည်အသွေး ) LUSTRE ။ ပြင်ပမှ အလင်းရောင်သည် ပုလဲသား အလွှာပါးလေးများအတွင်းသို့ ထိုးဖောက်ဝင်ရောက်ရိုက်ခတ်၍ အလင်းပြန်ခြင်းဖြင့် ပုလဲတစ်လုံး၏ တောက်ပမှုအလင်း ဖြစ်ပေါ်စေခြင်းအား ပွင့်ရည်ဟု ခေါ်ပါသည်။ တန်ဖိုးသတ်မှတ်ရာတွင် အခြေခံရသည့် အချက်များအားလုံးတွင် ပွင့်ရည်သည် အရေးကြီးဆုံးဖြစ်ပါသည်။ ပွင့်ရည်မရှိသော ပုလဲများသည် ထွန်းလင်းတောက်ပမှု မရှိဘဲအရောင်မှိန်နေပါသည်။

၂။    ပုလဲမျက်နှာပြင် ချောမွေ့ပြေပြစ်မှု SUR-FACE QUALITY ။ ပုလဲတစ်လုံးနှင့် တစ်လုံးမှာ မျက်နှာပြင်၏ အနေအထားပေါ်တွင် မူတည်၍ အရည်အသေးအားဖြင့် မတူညီနိုင်ပါ။ အနာအဆာကင်းသော ပုလဲများသည် ရှားပါးမှုကြောင့် အကောင်းဆုံးဟု သတ်မှတ်ခံရပြီး တန်ဖိုးအားဖြင့် ဈေးအလွန်ကြီးပါသည်။ မွေးပုလဲများသည် သက်ရှိသတ္တဝါမှ ထုတ်လုပ်ရခြင်းဖြစ်၍ အနာအဆာ တစ်မျိုးမျိုး ရှိနေတတ်ပါသည်။ စက်ရုံမှ ထုတ်လုပ်သကဲ့သို့ စင်းလုံးချောမရနိုင်ပါ။ ထိုအချက်သည် ပင်လျှင် သဘာဝ၏ထိတွေ့မှု ဖြစ်သောကြောင့် ပုလဲတစ်လုံးနှင့်တစ်လုံး ရာနှုန်းပြည့် မတူညီနိုင် သဖြင့် ပုလဲကိုမြတ်နိုးသူများ တန်ဖိုးထားစရာ ဖြစ်ပါသည်။

၃။    ပုလဲသား အလွှာ၏ အထူအပါး NACRE QUALITY ။ ပုလဲသား အလွှာထုသည် ပွင့်ရည် LUSTRE ဖြစ်ပေါ်စေရန် အခြေခံကျသည့် အချက်ဖြစ်ပါသည်။ ပုလဲသားအလွှာ ထူပါးခြင်းသည် ပုလဲ၏ အရည်အသွေးကို ဆုံးဖြတ်နိုင်ရန် အ ထောက်အကူပြုပါသည်။ ပိုမိုတောက်ပသော ပုလဲအများစုမှာ ပုလဲသားလွှာထူထဲမှုရှိပြီး ပုလဲသားလွှာပါးနေပါက အရောင်မှာမှိန်ပြီး ဖြူသော အရောင်အဆင်း ရှိနေပါသည်။ ပုလဲသားလွှာပါးနေပါက ပုလဲ၏တန်ဖိုး ကျဆင်းနိုင်ပါသည်။ ပုလဲသားလွှာထူမှသာ ရာစုနှစ်များစွာ ခိုင်ခံ့နေပြီး ဆွဲဆောင်မှုရှိသည့် အသွင်အပြင်ကိုလည်း ထိန်းထားနိုင်ပါသည်။ ပုလဲသားလွှာထူသည့် ပုလဲတိုင်းသည် တူညီသောပွင့်ရည် မရှိနိုင်ပါ။ ပုလဲသားလွှာများအတွင်း အလင်းဖောက်ထွင်း ဝင်ရောက်နိုင်မှုနှင့် ပုလဲသားအလွှာ အထပ်လေးများ အစီအစဉ်ကျန စွာ တည်ရှိနေမှုတို့ပေါ် မူတည်၍ ပွင့်ရည် မတူညီ မှုကို ဖြစ်စေပါသည်။ 

၎။    အရွယ်အစား SIZE ။ တောင်ပင်လယ် ပုလဲများသည် အရွယ်အစားကြီးသော ပုလဲများ ဖြစ်ပါသည်။ ပုလဲတစ်လုံးသည် သူ့အမျိုးအစားနှင့် သူရှိရမည့် အရွယ်ထက် ပိုမိုကြီးမားနေမည်ဆိုပါက ထိုပုလဲ၏မက်မောဖွယ်ကောင်းသော ရှားပါးသည့် အရည်အသွေး (Rarity) ကြောင့် အမျိုးတူပုလဲများထက် တန်ဖိုးအားဖြင့် ပိုမိုမြင့်မားလာမည် ဖြစ်ပါသည်။ 

၅။    ပုံသဏ္ဌာန် SHAPE ။ ပုလဲ၏ ပုံသဏ္ဌာန်အပေါ် မူတည်၍လည်း တန်ဖိုးကို ဆုံးဖြတ်ပါသည်။ လုံးဝန်းသော ပုလဲများသည် တန်ဖိုးအမြင့်ဆုံး ရရှိနိုင်ပါသည်။ 

၆။    အရောင် COLOUR ။ တောင်ပင်လယ် ပုလဲ၏ အခြေခံအရောင်အဖြစ် ငွေရောင်နှင့် ရွှေရောင်ဟု နှစ်ရောင်သတ်မှတ်ပါသည်။ အခြေခံအရောင်ပေါ်တွင် ထပ်မံစိုးမိုးပြီး ရောယှက်ဖြစ်ပေါ်နေသော အရောင်ကွဲများမှာ ပန်းရောင်၊ ရွှေအိုရောင်၊ ရွှေဝါရောင်နှင့် နို့နှစ်ရောင်တို့ ဖြစ်ပါသည်။ သက်တန့်ရောင်စဉ်ကဲ့သို့ မျက်နှာပြင်တွင် ရောင်စုံဖြာထွက်နေသော ပုလဲများသည် ဈေးအမြင့်ဆုံး ရစေသည်။

၇။    တူညီ လိုက်ဖက်မှု MATCHING ။ ပုလဲတစ်လုံးနှင့်တစ်လုံး တိကျစွာတူညီနိုင်ခြင်း မရှိပါ။ တူညီလိုက်ဖက်မှုသည် လည်ဆွဲသွယ်တန်းရာတွင်လည်းကောင်း၊ ပုလဲတစ်လုံးထက် ပိုမိုသော လက်ဝတ်ရတနာများ စီခြယ်ရာတွင် လည်းကောင်း၊ အထောက်အကူ ပြုသည်။ တူညီလိုက်ဖက်မှုရှိသည့် ပုလဲတစ်လုံးစီကို ညီမျှသောအကျိုး ကျေးဇူး ဖြစ်ပေါ်လာအောင် ဖန်တီးယူနိုင်မည်ဆိုလျှင် ထိုကဲ့သို့ တူညီလိုက်ဖက်မှုကို MATCHING ဟု ခေါ်ပါသည်။

မြန်မာ့ပုလဲ လုပ်ငန်းသည် ပင်လယ်ရေ မျက်နှာပြင်ပေါ်တွင် Surface Long Ling ဖြင့် မွေးမြူသည့်စနစ်ကို ပြောင်းလဲကျင့်သုံး မွေးမြူနိုင်ခဲ့သဖြင့် မည်သည့်ပင်လယ်ကြမ်းပြင် (ကျောက်၊ သဲ၊ ရွှံ့နွံ)မဆို ပုလဲမွေးမြူနိုင်သည့် အဆင့်ရောက်ရှိနေပြီ ဖြစ်ပါသည်။ ပုလဲမွေးမြူရာတွင်လည်း စက်ယန္တရားများ သုံးနေနိုင်ပြီဖြစ်သဖြင့် ပုလဲအမြောက်အများ မွေးမြူထုတ်လုပ်လာနိုင်ပြီ ဖြစ်ပါသည်။

မြန်မာ့ပုလဲလုပ်ငန်း၏ အဓိက ပုလဲမွေးမြူနေသော ကျွန်းစခန်းများမှာ...
(၁)    ဒိုမယ်လ်ကျွန်း - ပုလဲကျွန်း၊ ဘုတ်ပြင်းမြို့နယ်
(၂)    မလိကျွန်း - ပုလောမြို့နယ်
(၃)    ရွှေကျွန်းကြီး - ကော့သောင်းမြို့နယ်တို့ ဖြစ်ပါသည်။ ဖော်ပြပါ မြန်မာ့ပုလဲလုပ်ငန်း၏ ပုလဲမွေးမြူသော စခန်းများတွင် မြန်မာ့ပညာရှင်များက ထုတ်လုပ်မွေးမြူလျက်ရှိသော တောင်ပင်လယ် ပုလဲများသည် ကမ္ဘာ့ပုလဲဈေးကွက်တွင် လူကြိုက်များသော ပုလဲများဖြစ်ပါသည်။ အရည်အသွေး ကောင်းမွန်ရုံသာမက ရေရှည်ခိုင်မာသည့်အတွက် လူကြိုက်များပြီး တန်ဖိုးအမြင့်မားဆုံးပုလဲများ ဖြစ်ပါသည်။